شعر ترکی در مورد روستای کزج

روستای کزج

سلام اولسون مننن کزج کندینه
تورپاقنا، داغنا، دربندینه

قزل اوزننن توتوبدو داغلارا
دایکندینّن دَرَزدَکی باغلارا

کَت دولایسننّان دَره دَرانا
پیرلردن تا خرمنلردن اویانا

سلام اولسون او مهربان اهلینه
زحمت چَکن، اورک یانان اهلینه

آق سَقّقلّر، آق بیرچکلر، جاوانلار
اوشاق، بویوک، تازه آرواد آلانلار

گَنه اوشاقلقم دوشوبدیر یادا
حیف اولسون او گونلر گدیبدیر بادا

تک قویدلار کندی، کوچیب گتدیلر
کندین باشنا گور نَلَر گَتدلر

کَت دولایسنا چخب گدِیدیم
اوردان باخیبب بیر کزنی گورِیدیم

باخِیدیم اوردان بیر اوچان اویلره
اوچوب ایچینه داغلان اویلره

باخِیدیم اوردان قوریان باغلارا
قالب سوسوزلخدان یانان باغلارا

دونِیدیم گون باتانلارا باخِیدیم
قبرستاندا یاتانلارا باخِیدیم

چوخللاری او گونّن کی یاتبلار
او گوننده فاتحه سیز قالبلار

اوشاقلاری او وَقتدن کی گدیبلر
بیر دنه ده فاتحه وِرمییبلر

باخِیدیم اوردان قوجالار حالنا
اولار کی گویلر آغلیار حالنا

اوشاقلارن ایلدن ایله گورمییر
آرزی اِلیر کی پس نیا اولمییر؟

اَلن قویوبدر چَلیگین چینینه
اوقول قویوبدر گدیب اوز ایشینه

دیلینّن دوشمییر خییر دوعاسی
تا درده دوشمیه عزیز بالاسی

گوی گیزلَدم سینَمدکی دردیمی
وصف اِیلییم من بو گوزل کندیمی

گون چخبدر، هوا ائشخلانبدر
عَمی، خورجون اشّک اوسته سالبدر

بیچین وقتی یاواش یاواش باشلانب
اِیمَلَر یمیشانلاردان آسلانب

اوراخلارا قورا چَکیر بیر بَه بیر
بارماخ چَکیر دِئیر: اوبیرسین گَتیر

اَل اِیلییر وَر دالندا اوراقا
هر دم دِئییر باش ورون اُو اولاغا

قوش یواسیچین دولانی خرداسی
او اوز کفینده، دَدَسن تَر باسی

بالام یری دولان تاپ قورو بوداخ
چایدانی دولدور سویونان، چای قویاخ

ناهار اولور، دوغرامانی جورریییر
اویدَن گَترَن آلمالاردان ییر

آخشام اولور آلتنی بیر روب گچیر
اویده کی حیوانلارچن اوت بیچیر

آخشام اولوب داوار گلیب بایردان
قارنلاری چخب اوتدان چایردان

بیری چاقرر: آی یاد اولاق سالان
بیری دییر: بایردا قالماز اَلان

بیری دییر کی: اولاقون نه رَهدی؟
دییر: گوی اولاق، قولاقی دَلیهدی

بیری دییر: اوس کوچَده سس گلیر
بیری دییر: بیزیم گویوندر مَلیر

بیری دییر: نوباچینی گورگینن
نوباچی دی: سَن هَله بیر گَزگینَن

دییر: بابام، چوخ دولاندم، تاپمادم
آخر گِتدیم قوردون آغزن باغلادم

تاپلمیاندادا دِییر یالاننان:
بیر اولاقم گِتدی باشی قزلدان

کندیمیزین چوخدو بوجور زادلاری
چوخ واردر شیر زن آروادلاری

تنگلرینّن گچیرم بیر بَه بیر
تَندر سالبدلار یاپللار فتیر

آخ نه هوس ایلدیم آیران آشی
تُرش آشی، او دردلره درمان آشی

یایدا گِتدیم ددمینن خَلوَرَه
اون باغ چاتدر، بیر باغ قویدر سَلوَرَه

فیکر اِیلیَردی خَلوَری داقلماز
دییَردی: (سور اروپیا، آشرماز)

یولدا گَلیب خلوریمی آشردم
اِشّگین کُتَگین اِشّگه وردم

آشدیم، گوشدیم، اُون سِری، گون باتانجاخ
آخ نه چَکدیم گَلیب اُویه چاتانجاخ

گِتدیم باغا، اوزوم دَرَم آلاهدان
دوشدیم، قولوم سندی بویوک بوداخدان

آخ نه چَکدیم اوزوملَری دَرَنه
قَرَنقولوخلاشد اُویه گَلَنه

لاک توپومو گُتدیم گِتدیم میدانا
اویناتمادلار، قالدم یانا یانا

جَفَر گیرَردی میدانا، قاتاردر
داش گوتورَردی میدانا آتاردر

بِش تومَنّیک آلسکالار هاردادی؟
بالقز خالا دای توکانی باغلادی

قار یاغاردی، چَکمَلَری گِیَردیک
آردشلخدان سوروشگَن اِیلیَردیک

بیربیریمیزدن یاپشب گِدَردیک
دالدان توقّا وروب چُلاق اِلَردیک

زنگ تفریح، کلاسلاردان چخاردیک
چخب شخن سیمکَسینده یاتاردیک

زنگ تفریح پنیر چورک ییَردیک
تغذیه لَردَن دَوَ جورّیَردیک

دَرسَ باخمامشدم، تقصیر اُوزیمده
هنوزده سیلّینین یِری اوزومده

هِی دِدیلَر: چخسون، دوچَرخه آلّیک
هَر یِره کی دِسون، سَنی آپارّیک

هِش وقت دوچرخَنین اوزین گورمَدیم
یوخومدادا دوچَرخَنی سورمَدیم

یاز گونلَری کورپَلَری آپاردیک
آخشامِینتاک زَردَه سَردَه اُوتاردیک

آخشام جاقی کورپه گَلَن زاماندا
هامّی تَنگَده منتظر قالاندا

یالاننانی (کورپه گَلدی) دیَردیک
هامّی دوراردر، دویونجا گولَردیک

آخ کی اوشاقلق گونی هاردا قالدی؟
بیز بُویودیک، دلخوشلوخلار آزالدی

چوخ قوجالار، چوخدانکیدیر اولوبلر
چوخ جاوانلار اویلنیبلر گدیبلر

دوزدیر آبادّاشیب، چوخ ایشلنیب اُوی
آمّا دای کَندیمیز هَمانکی کَت دُوی

آی اولارکی کَتدَن کوچیب گِدیبسوز
کَتدَن گِدَننن سُورا نیلییبسوز؟

هِش نه سوزلریچین چاتماز وَطَنه
هَر یِرده اولسوز، کَزَلیسوز گَنه

کندین گوزی چوخدانکیدیر یولدادر
سوز کوچَننن سُورا آباد اولمادر

باخما ایزوگام اولدو داملارندا
کندین آباددغی آداملارندا

تهرانداسوز، شمالداسوز، یَزدَسوز
باخون گورون گِدَلی نه وَضعدَسوز؟

بِش طبقه ساختمانوز اولسادا
حسابلاروز بانکلاردا دولسادا

دوزدی کی واردر پولن چوخ ارزیشی
اگر اوزوز گولمَسه، یوخ ارزیشی

هر یِردَسوز، چخوز گَلوز کَندوزا
ساقلخ آرزی اِلیییرم هامّوزا

#شاعر: عبدالخالق رضایی کزج

1 دنبال این می گردید “شعر ترکی در مورد روستای کزج

  1.  سلام لذت آلدیم شعر نیزدن

    :

     

    ایکی بیت تشکر اوچون خانم نوبخت تبریزی شعر لرینن گونده ریرم :داداش هی دئمه سن      

    گاه دونه نی بویونی

    حق آچاجاخ 

    ناحق سالن دویونی 

    اراز رگلیر آخا آخا ائلرملر شاخا شاخا

     کتب نوبخت: نامرد الینده اسی و شیر شیران        مجنون چوللرده سرگردان          بولوت آغلور چشم گریان

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *